Wednesday, February 16, 2011

இலங்கைக் கடற்படைக்கு இரையா தமிழக மீனவன்?

கட்டிய மனைவி தொட்டில் பிள்ளை

உறவைக் கொடுத்தவர் அங்கே

அலை கடல் மேலே அலையாய் அலைந்து

உயிரைக் கொடுப்பவர் இங்கே" 

எனக் கவிஞர் வாலி படகோட்டித் திரைப்படத்தில் எழுதிய பாடல் இன்று தமிழக மீனவர்களுக்கு நன்றாகப் பொருந்துகிறது.
பண்டைய நாட்களில் மீனவர்களுக்குக் "கடலம்மா" கோபமுற்றால் மட்டுமே இழப்பு வரும். இயற்கைச் சீற்றத்தால் எழும் புயலும் மழையும் அலைகளின் ஆழித் தாண்டவமும் அவர்களுக்கு இழப்பை ஏற்படுத்தும். இப்போது அதிநவீன எந்திரங்கள் பொருத்திய விசைப்படகுகள், திசைமாறிப் போனவர்களைக் கண்டுபிடிக்க உதவும் காவல் படகுகள், ஹெலிகாப்டர் தேடுதல்கள் என வசதிகள் பெருகி விட்டதால் உயிர் இழப்புகளைப் பற்றிய கவலை இன்றி நாட்கணக்கில் ஆழ்கடலில் தங்கி மீனவர்கள் மீன் பிடிக்கின்றனர். ஆனால் தமிழக மீனவனுக்கு மட்டும் இன்னல் தீரவில்லை.

ஆம் அவனது இன்னல் இலங்கைக் கடற்படை வடிவில் தொடர்கிறது.

தமிழ்நாட்டின் காலடியில் கண்ணீர்த் துளிபோல் தொங்கிக் கொண்டிருக்கும் இலங்கைத் தீவில் தமிழர்கள் பட்ட, படுகின்ற துயரம் உலகறிந்தது. இலங்கையின் குடிமக்களாக வாழும்  ஈழத்தமிழர்  மட்டுமின்றி அங்கு பிழைப்புக்காகச் சென்ற இந்தியத் தமிழர்கள்(மலையகத் தமிழர்) கூட விரட்டியடிக்கப்பட்ட கொடுமை நடந்தது.

அலைகடல் நடுவே வளம் செறிந்த மண்ணாக இருந்த இலங்கைத் தீவின் தென் பகுதியைத் தேயிலை, காப்பி, ரப்பர் தோட்டங்களாய்  மாற்ற, இரத்தத்தை வியர்வையாய் விதைத்தவர்கள் மலையகத் தமிழர்கள். இந்தியாவில் இருந்து தோட்டப் பணிக்காக ஆங்கிலேயரால் அழைத்துச் செல்லப்பட்டவர்கள் 'மலையகத் தமிழர்கள்' என அடையாளமிடப்பட்டார்கள். ஆங்கிலேயரின் ஆட்சியிலிருந்து  இலங்கை 1948-ஆம் ஆண்டில் விடுதலை அடைந்தவுடன், '120 ஆண்டுகளுக்கு முன்புதான் இவர்கள் இலங்கை மண்ணில் குடியேறினர்' என்று சொல்லி, சிங்கள அரசு மலையகத் தமிழர்களின் குடியுரிமையைப் பறித்தது. மலையகத் தமிழர்களை எப்போதுமே மதித்திராத இலங்கைத்தீவின் மண்ணின் மைந்தர்களான  ஈழத்தமிழர்கள் இதைப்  பெரிதாக எதிர்க்கவில்லை.  மலையகத் தமிழர்களின் குடியுரிமை பறிக்கப்பட்டபோது, அரசுக்கு உடந்தையாக இருந்த பொன்னம்பலம் அமைச்சரானார். இதனால் ஈழத்தின் தந்தை எனப் போற்றப்படும் செல்வா பொன்னம்பலத்திடமிருந்து பிரிந்து சென்றார்.  மலையகத் தமிழர்களை நாடற்றவர்களாக்கியது சேனநாயக்கா அரசு.

1964 ஆம் ஆண்டு அக்டோபர் 30 இல்  இந்தியப் பிரதமர் லால்பகதூர் சாஸ்திரிக்கும் இலங்கைப் பிரதமர் சிரிமாவோ பண்டார நாயக்காவுக்கும் இடையே கையெழுத்தான ஒப்பந்தத்தின் அடிப்படையில்  இலங்கையில் நாடற்றவர்களாக இருந்த 9,75,000 இந்திய வம்சாவளித் தமிழர்களில் மூன்று லட்சம் பேருக்கு மட்டும் இலங்கைக் குடியுரிமை வழங்கப்பட்டது. 5,25,000 பேரை இந்தியா ஏற்றுக்கொள்ளும் என முடிவானது.. மீதி 1,50,000 பேர் முடிவு ஏதுமின்றி நிர்க்கதியாய் விடப்பட்டனர் என்பது வரலாறு..

இது மட்டுமின்றித் தமிழகத்திலிருந்து வணிகம் செய்வதற்காக இலங்கை சென்ற  தமிழர்களைக் கூட இனக்கலவரத்தில் சிங்களர் கொன்றனர்.
தமிழக மீனவர்கள் ஓய்வெடுக்கவும்  வலைகளை உலர்த்தவும் பயன்பட்டு வந்த கச்சத்தீவையும் இலங்கைக்குத் தாரைவார்த்துக் கொடுத்தார் சாஸ்திரிக்குப் பின் பிரதமரான இந்திராகாந்தி.
அதன் பிறகு இலங்கையின் சிங்களக் கடற்படையினரின் அட்டகாசம் தொடங்கியது. தமிழக மீனவர்களின் படகுகளைச் சேதப்படுத்தியும்  வலைகளை அறுத்தும் மீன்களைக் கொள்ளையடித்தும் இன்னல்களை ஏற்படுத்தினர். அப்போதே இந்தியா உறுதியான நடவடிக்கை எடுத்திருந்தால் சிங்களக் கடற்படைக்குக் குளிர்விட்டுப் போயிருக்காது. ஆனால் தமிழ்நாட்டை ஆண்டவர்கள் டெல்லிக்கு ஸலாம் போடும் வேலையைச் செய்வதில்தான் அதிக அக்கறை காட்டினர். தமிழகத்தின் எதிர்ப்பைக் கடுமையான முறையில் மத்திய அரசுக்குத் தெரிவித்து உரிய நடவடிக்கை எடுத்திருந்தால் இன்று சிங்களக் கடற்படையால் நாள்தோறும் தமிழர்கள் கொல்லப்படுவது  நடக்குமா?

இந்தியாவிடமிருந்து ராணுவ உதவிகளையும் ஆயுதங்களையும் பெற்றவர்கள் இந்தியாவுக்குப் பரிசாகத் தந்தது மரணங்களையே! தமிழக மீனவர்கள் ஏறத்தாழ ஐநூறுக்கும் மேற்பட்டோர் இதுவரை இலங்கைக் கடற்படையினரால் கொல்லப்பட்டுள்ளனர். கடலில்  எல்லை தாண்டி மீன்பிடிக்க வருவோரைக் கைது செய்வதும் பின்னர் வழக்கு விசாரணைகளும் தூதரக நடைமுறைகளும் முடிந்தபின் அவர்களின் நாட்டுக்குத் திருப்பி அனுப்புவதுமே உலக நடைமுறை. ஆனால் சிங்களக் கடற்படை மட்டும் தங்களுக்கெனத் தனிச் சட்டத்தை உருவாக்கித் தமிழக மீனவர்களைக் கொல்வதை இந்தியா இன்னும் வேடிக்கைபார்த்துக் கொண்டிருக்கிறது. இது தொடர்பாகப் பேச்சு வார்த்தை நடத்த இலங்கைக்கு இந்திய  வெளி உறவுத்துறை அமைச்சர் சென்றாலும் வெளி உறவுத்துறைச் செயலாளர் சென்றாலும் எல்லாம் கண்துடைப்பு நாடகங்களாகவே முடியும் என்பது கடந்த கால வரலாறு.

இலங்கைக் கடற்படையின் கொலைவெறிக்கு முற்றுப்புள்ளி வைக்க வேண்டுமெனில், "வணங்காமுடிபதில்கள்" பகுதியில் சொல்லப்பட்டிருந்தபடி,

"இந்திய அரசு உண்மையான அக்கறையுடனும் முழுமனதுடனும் முயன்றால் இதை நிறுத்தி விடலாம்.

மீண்டும் இதுபோல் இந்திய மீனவர்களைக் கொன்றால் ஏற்படும் மோசமான பின்விளைவுகள் பற்றி இலங்கை அரசுக்குக் கடுமையான எச்சரிக்கை விடவேண்டும்.

இலங்கைக்கும் இந்தியாவுக்கு இடையே தெளிவான கடல் எல்லையை வகுத்து, அதை மீனவர்களுக்குத் தெளிவாக அறிவித்துவிட வேண்டும்.

நம் எல்லைக்குள் அத்துமீறி நுழையும் இலங்கைக் கடற்படையினரை இந்தியக் கடற்படை கைது செய்ய வேண்டும்.

தமிழகக் கடலோரங்களில் செயல்படும் கடற்படையில் தமிழர்களான அதிகாரிகளையும் வீரர்களையும் பணியில் அமர்த்த வேண்டும்"

என்பதே தீர்வாகும்.
- ரஸ்ஸல்.
(ரஸ்ஸலின்

Monday, February 7, 2011

எகிப்து மக்கள் புரட்சி - 7ஆம் நாள்

எகிப்தின் அதிபராக கடந்த 30 ஆண்டுகளாகப் பதவி வகித்து வரும் ஹோஸ்னி முபாரக் பதவி விலகக் கோரி நடைபெற்று வரும் மக்கள் புரட்சி 7ஆம் நாளாகத் தொடர்கிறது.

எகிப்தில் நிலவி வரும் வேலை வாய்ப்பின்மை மற்றும் ஏழ்மையால் அதிருப்தியில் இருந்த மக்கள் அண்டை நாடான துனீசியாவில் ஏற்பட்ட மக்கள் புரட்சியைத் தொடர்ந்து வீதிக்கு வந்து போராட்டத்தில் குதித்தனர். கடந்த 24 ஆம் தேதி ஹோஸ்னி முபாரக்கிற்கு எதிராக ஆரம்பித்த இந்த மக்கள் புரட்சி, இன்றும் ஏழாவது நாளாக தொடர்ந்து நடந்து வருகிறது.

போராட்டம் வலுக்க ஆரம்பித்த உடன், அமைச்சரவையைக் கலைத்த ஹோஸ்னி முபாரக், தனக்கு நெருக்கமான முன்னாள் இராணுவ அமைச்சர் மூன் அஹ்மத் ஷபீஃக்கைப் பிரதமராகவும் உளவுத்துறை தலைவர் உமர் சுலைமானை துணை அதிபராகவும் நியமித்து உத்தரவிட்டார். இதனை ஏற்றுக்கொள்ளாத மக்கள், ஹோஸ்னி முபாரக் பதவி விலகுவது மட்டுமே தங்களின் போராட்டத்திற்கு முடிவு ஏற்படுத்தும் என்று ஒற்றை குரலில் தொடர் போராட்டம் நடத்தி வருகின்றனர்.

ஹோஸ்னி முபாரக்கிற்கு எதிரான இப்புரட்சிக்கு, உலகெங்கிலுமுள்ள எகிப்தியர்கள் தங்கள் உறுதியான ஆதரவைத் தெரிவித்துள்ளனர். குறிப்பாக, அமெரிக்காவிலுள்ள எகிப்தியர்கள் மிகப்பெரும் பேரணியொன்றை எகிப்து புரட்சிக்கு ஆதரவாக நடத்தியது குறிப்பிடத்தக்கது.


இதற்கிடையில், எகிப்தில் நடக்கும் சம்பவங்களை உடனுக்குடன் உலக மக்கள் முன் கொண்டு சென்று கொண்டிருந்த அல் ஜஸீரா தொலைகாட்சி அலைவரிசைக்கு எகிப்து தடை விதித்துள்ளது. அல் ஜஸீராவுடனான அனைத்து ஒப்பந்தங்களையும் விலக்குவதாகவும் அல் ஜஸீரா செய்தியாளர்களுக்கு வழங்கிய செய்தியாளர் உரிம அட்டைகளைத் திரும்ப பெறுவதாகவும் எகிப்து அரசு அறிவித்துள்ளது.

எகிப்து மக்கள் புரட்சி 7ஆம் நாள் நிகழ்வின் சில துளிகள் வருமாறு:

* கெய்ரோவின் மையப் பகுதியில் உள்ள தஹ்ரீர் ஸ்கொயர் என்ற இடத்தில் கூடி மக்கள் ஆர்ப்பாட்டத்தில் ஈடுபட்டுள்ளனர்.

* செவ்வாய்க் கிழமையன்று(01/02/2011) எகிப்து முழுவதும் முழு அடைப்பிற்கு அழைப்பு விடுக்கப்பட்டுள்ளது.

* அரபி மற்றும் ஆங்கிலத் தொலைக்காட்சியான அல் ஜஸீராவின் ஒளிபரப்பிற்கு எகிப்திய அரசு தடை விதித்துள்ளது.

* அல்ஜஸீரா தொலைக்காட்சியின் ஒளிபரப்புக் கருவிகள் கைப்பற்றப்பட்டுள்ளன. அதன் 5 செய்தியாளர்கள் கைது செய்யப்பட்டுள்ளனர்.

* எகிப்திய நாடாளுமன்றத்தைக் கலைக்க வேண்டும் என முக்கிய எதிர்கட்சியனா இக்வானுல் முஸ்லிமீன் கட்சி கோரியுள்ளது.

* துப்பாக்கிச் சூடு மற்றும் வன்முறைச் சம்பவங்களில் பலியானோரின் எண்ணிக்கை 150ஆக உயர்ந்துள்ளது.

* வெளிநாட்டு விமானங்கள் தங்கள் நாட்டினரை அழைத்துச் செல்ல ஒரு சேரக் குவிந்துள்ளதால் கெய்ரோ விமான நிலையம் நிரம்பி வழிகிறது.

* சுமார் ஆயிரத்துக்கும் மேற்பட்ட போராட்டக்காரர்களை எகிப்து அரசு கைது செய்துள்ளது.

* இறுதியாக நடைபெற்ற நாடாளுமன்றத் தேர்தல் செல்லுபடியாகுமா என்பது குறித்து விசாரணை மேற்கொள்ளப்படும் என நாடாளுமன்ற சபாநாயகர் அறிவித்துள்ளார்.

* தன்னுடைய அமைச்சரவையில் மேலும் பல மாற்றங்களைச் செய்து ஹோஸ்னி முபாரக் விரைவில் அறிவிப்பு வெளியிடுவார் என்று எதிர்பார்க்கப்படுகிறது.

* எகிப்தின் தற்போதைய நிகழ்வுகள் 1979ஆம் ஆண்டு ஈரானில் ஏற்பட்ட இஸ்லாமியப் புரட்சியை நினைவூட்டுவதாகவும் ஆனால் ஐநா சபையின் அணு ஆயுதக் கண்காணிப்பாளராக இருந்த முஹம்மது அல் பராதியை எகிப்தின் தலைவராக முன்னிறுத்தும் பணியை அமெரிக்கா செய்து வருவதாகவும் ஈரான் கூறியுள்ளது.

* எகிப்திய அதிபர் ஹோஸ்னி முபாரக்குக்கு இஸ்ரேல் தன்னுடைய ஆதரவைத் தெரிவித்துள்ளது.

ஸ்பெக்ட்ரம் ஒதுக்கீடு: 2ஜி ஊழலை விட மகா ஊழல் அம்பலம்

2ஜி ஸ்பெக்ட்ரம் ஒதுக்கீட்டை விட மற்றொரு மகா ஸ்பெக்ட்ரம் ஒதுக்கீடு ஊழலை மத்திய தலைமை கணக்கு தணிக்கையாளர் (சிஏஜி) அம்பலப்படுத்தியுள்ளார்.

2ஜி ஸ்பெக்ட்ரம் அலைவரிசை ஒதுக்கீட்டில் முறைகேடு நடந்ததால் நாட்டுக்கு ரூ. 1 லட்சத்து 76 ஆயிரம் கோடி இழப்பு ஏற்பட்டதாக மத்திய தலைமை கணக்கு தணிக்கையாளர் தாக்கல் செய்த அறிக்கையால், எதிர்க்ட்சிகள் மற்றும் உச்ச நீதிமன்றத்தின் கடும் கண்டனத்திற்கு மத்திய அரசு ஆளானதோடு, அந்த ஊழல் வழக்கின் விசாரணையையும் வேகம் பிடிக்கவைத்தது.

அத்துடன் முன்னாள் தொலை தொடர்புதுறை அமைச்சர் ஆ.ராசாவும் சிபிஐ-யால் கைது செய்யப்பட்டுள்ளார்.

இந்நிலையில் இந்த ஊழலையே முழுங்கி ஏப்பம்விடும் மற்றொரு ஸ்பெக்ட்ரம் ஒதுக்கீடு ஊழல் அம்பலமாகியுள்ளது.

இந்திய விண்வெளி ஆராய்ச்சிக் கழகமான இஸ்ரோ ஏலம் இல்லாமலேயே செய்த எஸ்-பேண்ட் அலைவரிசை ஒதுக்கீட்டில் நடந்த முறைகேட்டினால் 2லட்சம் கோடி ரூபாய் அளவுக்கு இழப்பு ஏற்பட்டுள்ளதாக சிஏஜி அறிக்கை தெரிவிக்கிறது.

அதாவது இஸ்ரோ அனுப்பும் செயற்கை கோள்களில் இருந்து பெறப்படும் அலைவரிசைகள் பல்வேறு தனியார் நிறுவனங்களுக்கு விற்கப்படுகிறது.

இந்த அலைக்கற்றைகளை வர்த்தக ரீதியில் ஒதுக்கீடு செய்யும் பணிகளை மேற்கொள்ள இஸ்ரோவால் உருவாக்கப்பட்ட நிறுவனம் 'ஆண்ட்ரிக்ஸ்'.

இந்நிறுவனம், கடந்த 2005 ஆம் ஆண்டு, 'தேவாஸ் மல்டி மீடியா' என்ற தனியார் நிறுவனதிற்கு 70 மெகாஹெர்ட்ஸ் அலைவரிசைகளை விற்க ஒப்பந்தம் செய்துகொண்டது.

20 ஆண்டுகள் வரை இந்த அலைவரிசையை பயன்படுத்திக் கொள்ள ரூ.1000 கோடி மட்டுமே 'தேவாஸ் மல்டி மீடியா'நிறுவனத்திடமிருந்து கட்டணமாக பெற்றுக்கொள்ளப்பட்டு, அதற்கான ஒப்பந்தத்திலும் இது தெரிவிக்கப்பட்டுள்ளது.

ஆனால் பொதுத் துறை நிறுவனங்களான பி.எஸ்.என்.எல். மற்றும் எம்.டி.என்.எல். தொலைபேசி நிறுவனங்களுக்கு 20 மெகா ஹெட்ஸ் அலைவரிசைகளை ஒதுக்கிய இஸ்ரோ, அதற்கு கட்டணமாக ரூ.12 ஆயிரத்து 847 கோடி பெற்றுள்ளது.

அதாவது தனியாருக்கு விற்ற தொகையைவிட பொதுத் துறை நிறுவனங்களிடமிருந்து பல மடங்கு கூடுதல் கட்டணம் வசூலிக்கப்பட்டு, அதே சமயம் தனியார் நிறுவனமான 'தேவாஸ் மல்டி மீடியா'வுக்கு மிக மிக குறைந்த தொகையில் அலைவரிசைகளை ஒதுக்கியுள்ளது.

இதன் மூலம் அரசுக்கு சுமார் 2 லட்சம் கோடி ரூபாய் இழப்பு ஏற்பட்டுள்ளது பொது கணக்கு தணிக்கை துறை ஆய்வில் தெரியவந்துள்ளதாக சிஏஜி தெரிவித்துள்ளார்.